Allir Íslendingarnir á förum frá Bayern?

Þær Cecilía Rán Rúnarsdóttir, Glódís Perla Viggósdóttir og Karólína Lea Vilhjálmsdóttir gætu allar verið á förum frá knattspyrnuliði Bayern München í Þýskalandi.

Þetta herma heimildir mbl.is og Morgunblaðsins, en rætt var um málið í Fyrsta sætinu, íþróttahlaðvarpi mbl.is og Morgunblaðsins.

Glódís Perla er á óskalista enska úrvalsdeildarfélagsins Arsenal, eins og greint var frá í síðasta þætti Fyrsta sætisins.

Frétt af mbl.is

Arsenal vill íslenska landsliðsfyrirliðann

Þá hafa bæði Cecilía Rán og Karólína Lea fengið afar fá tækifæri með aðalliði Bayern München frá því þær gengu til liðs við það, Cecilía í janúar 2022 og Karólína í janúar 2021.

Cecilía, sem er 19 ára, lék engan leik með aðalliði félagsins á tímabilinu en hún lék þó 16 leiki með B-liði félagsins í þýsku B-deildinni.

Karólína, sem er 21 árs, lék rúmlega 230 mínútur með Bæjurum í þýsku 1. deildinni á leiktíðinni og kom við sögu í sjö leikjum en hún kom inn á sem varamaður í þeim öllum.

„Það er nauðsynlegt fyrir alla landsliðsmenn, sama í hvaða íþrótt það er, að þú sért að spila reglulega,“ sagði íþróttafréttamaðurinn fyrrverandi Guðjón Guðmundsson, betur þekktur sem Gaupi, í Fyrsta sætinu þegar rætt var um Íslendingana í München.

Umræðan um Íslendingana í München hefst á 1:02:00 mínútu en hægt er að hlusta á umræðuna í heild sinni í spil­ar­an­um hér fyr­ir ofan. Þátt­ur­inn er einnig aðgengi­leg­ur á öll­um helstu hlaðvarps­veit­um.

• Blogga um frétt