Ísland mun eiga fjóra fulltrúa á frjálsíþróttamótinu Bauhaus Junioren Gala í Mannheim í Þýskalandi um næstu helgi.
Mótið er sterkt, alþjóðlegt mót fyrir fremsta frjálsíþróttafólk heims á aldrinum 16-19 ára. Á þessu móti hefur Aníta Hinriksdóttir náð frábærum árangri en hún setti þar Íslandsmet í 800 metra hlaupi sumarið 2013 sem stóð allt þar til að Aníta bætti það sjálf á Ólympíuleikunum í fyrra.
Íslensku keppendurnir í ár eru þau Tiana Ósk Whitworth, Guðbjörg Jóna Bjarnadóttir, Dagur Andri Einarsson og Erna Sóley Gunnarsdóttir. Tiana og Guðbjörg keppa í 100 og 200 metra hlaupi, sem og Dagur. Erna keppir í kúluvarpi.
Þjálfararnir Einar Þór Einarsson og Pétur Guðmundsson verða með hópnum.