Ísland mætir Þýskalandi í Kazan

Kristófer Darri Finnsson og Margrét Jóhannsdóttir eru bæði í landsliðinu.
Kristófer Darri Finnsson og Margrét Jóhannsdóttir eru bæði í landsliðinu. Ljósmynd/Badmintonsamband Íslands

Dregið hefur verið í riðla fyrir Evrópukeppni karla- og kvennalandsliða í badminton sem fer fram í Kazan í Rússlandi dagana 13.–18. febrúar 2018.

Íslenska karlalandsliðið dróst í þriðja riðil með Þýskalandi, Lúxemborg og Aserbaídsjan. Það má segja að liðið sé heppið með riðil. Karlalandsliðið hefur einu sinni mætt Lúxemborg, árið 2012, og vann þá 3:2. Við höfum ekki mætt Aserbaídsjan eða Þýskalandi, sem er raðað inn í riðilinn. Alls taka 29 þjóðir þátt í Evrópukeppni karlalandsliða.

Íslenska kvennalandsliðið dróst í riðil 1 með Danmörku, Svíþjóð og Ísrael. Það er öllu erfiðari riðill. Við höfum einu sinni unnið Svíþjóð, árið 2010 en þá unnum vann kvennalandsliðið 4:1. Karlalandsliðið hefur tapað fyrir Svíum þrisvar og kvennalandsliðið einu sinni, árið 1984. Við höfum aldrei unnið Dani. Við höfum mætt Ísrael þrisvar, einu sinni með kvennalandslið okkar og tvisvar í landsleik blandaðs liðs og unnið í öll skiptin, árin 1994 4:1, 2011 4:1 og 2015 3:1. Alls taka 24 þjóðir þátt í Evrópukeppni kvennalandsliða.

Landsliðin skipa:

Daníel Jóhannesson, Davíð Bjarni Björnsson, Kári Gunnarsson og Kristófer Darri Finnsson.

Arna Karen Jóhannsdóttir, Margrét Jóhannsdóttir, Sigríður Árnadóttir og Þórunn Eylands.

Þau koma öll úr TBR.

mbl.is
Fleira áhugavert
Fleira áhugavert