Svíinn Andre Myhrer vann í nótt óvæntan sigur í svigi karla á Vetrarólympíuleikunum í Pyeongchang í Suður-Kóreu. Sturla Snær Snorrason átti að keppa í sviginu en vegna meiðsla gat hann ekki keppt eins og áður hefur komið fram á mbl.is.
Ramon Zenhaeusern frá Sviss vann til silfurverðlauna en hann varð 0,34 sekúndum á eftir Myhrer og Austurríkismaðurinn Michael Matt hreppti bronsverðlaunin en hann var 0,67 sekúndum á eftir Svíanum.
Myhrer, sem er 35 ára gamall, fylgir þar með í fótspor sænsku goðsagnarinnar Ingimars Stenmarks en hann er annar Svíinn til að vinna gull í alpagreinum á Vetrarólympíuleikum. Þetta voru önnur ólympíuverðlaun Myhrer en hann vann til bronsverðlauna í svigi í Vancouver árið 2010. Myhrer er elsti maðurinn til þess að vinna gullverðlaun í svigi á Vetrarólympíuleikum frá upphafi.
Austurríkismaðurinn Marcel Hirscher, sem flestir höfðu spáð sigri, féll í fyrri ferðinni og Norðmaðurinn Henrik Kristoffersen, sem var með forystuna eftir fyrri ferðina, náði ekki að ljúka síðari ferðinni. Myhrer var með annan besta tíma eftir fyrri ferðina.