Íslandsmótið í sundi í 50 m laug hófst í dag í Laugardalslauginni og var margt af okkar fremsta sundfólki í eldlínunni. Predrag Milos úr SH nældi í tvenn gullverðlaun. Hann kom fyrstur í mark í 50m skriðsundi á tímanum 23,12 sekúndur og á 57,74 sekúndum í 100m flugsundi.
Eygló Ósk Gústafsdóttir var með yfirburði í 200m baksundi og kom fyrst í mark á 2:15,24 mínútum. Anton Sveinn McKee vann 100m bringusund karla á tímanum 1:01,92 mínútu.
Jóhanna Elín Guðmundsdóttir vann 50m skriðsund á tímanum 27,04, Karen Mist Arngeirsdóttir synti 100 metra bringusund á 1:13,55 mínútu og kom fyrst í mark og Brynjólfur Óli Karlsson vann 200 baksund á tímanum 2:09,38 mínútum.
Tvær boðsundsgreinar fóru fram í dag. Sunddeild Breiðabliks vann 4x 200 metra skriðsund kvenna á 8:49,51 mínútum og Ægir vann 4x 200 metra skriðsund karla á 8:01,48 mínútum.