Manny Pacquiao, einn vinsælasti hnefaleikamaður heims, varð heimsmeistari í nótt er hann vann öruggan sigur á Lucas Matthysse í Kúala Lúmpúr í Malasíu. Pacquiao er hvergi nærri hættur þótt hann sé 39 ára gamall.
Filippseyingurinn sló Matthysse fyrst niður í þriðju lotu og stöðvaði dómarinn bardagann í sjöundu lotu er Mathysse fór í gólfið í þriðja skipti eftir þungt skrokkhögg.
Sigurinn var sá fyrsti sem Pacquiao vinnur án dómaraúrskurðar síðan árið 2009 og 60. sigurinn á ferlinum. Búast má við að Pacquiao haldi áfram að stunda íþróttina fram yfir fertugt.