Íslandsmeistarar karla í íshokkí, SA, unnu 3:2-sigur gegn spænska liðinu Txuri Urdin frá Spáni í lokaleik sínum í C-riðli 2. umferðar Evrópubikarsins í Riga Lettlandi í dag. Staðan að loknum fyrsta leikhluta var jöfn, 0:0, en Hafþór Sigrúnarson kom íslenska liðinu yfir í öðrum leikhluta. Juan Munoz jafnaði metin fyrir Txuri Urdin undir lok annars leikhluta og staðan því 1:1.
Jussi Sipponen kom SA í 2:1 í upphafi þriðja leikhluta og Jóhann Leifsson tvöfaldaði forystu SA, fimmtán mínútum fyrir leikslok. Martins Jakovleves klóraði í bakkann fyrir Spánverjana þegar fimm mínútur voru til leiksloka en lengra komust liðsmenn Txuri Urdin ekki og lokatölur því 3:2 fyrir SA.
Skautafélag Akureyrar lýkur keppni í þriðja sæti riðilsins með 3 stig en Donbass frá Úkraínu og Kurbads Riga frá Lettlandi munu berjast um efsta sæti riðilsins, síðar í dag.
SA vann alla þrjá leiki sína í 1. umferð keppninnar en þá var leikið í Búlgaríu.