Haraldur fer seint út

Haraldur Franklín Magnús, úr Golfklúbbi Reykjavíkur, fer á teig á Carnoustie í dag um það leyti sem Íslendingar setjast niður í þrjúkaffið. Ráshópur Haraldar er sá þriðji síðasti sem ræstur er út í dag á öðrum degi The Open Championship. 

Haraldur fer á teig klukkan 15:54 að staðartíma í Skotlandi eða klukkan 14:54 að íslenskum tíma. Hann mun því ekki ljúka leik fyrr en á níunda tímanum um kvöldið að staðartíma. 

Hringurinn hjá Haraldi og félögum í gær tók um það bil fimm klukkutíma en hlutirnir ganga ekki alltaf hratt fyrir sig á jafnstórum viðburði og The Open. 

Þegar Haraldur skilar inn skorkorti sínu verður orðið nánast ljóst hvort hann nái niðurskurði keppenda eða ekki en eftir fínt skor í gær á hann ágæta möguleika á því. 

Zander Lombard frá Suður-Afríku leikur með Haraldi í dag eins og í gær en ekki er hróflað við ráshópunum fyrstu tvo dag á móti sem þessu. Lombard lék á fjórum undir pari í gær og var á meðal efstu manna. Fyrir vikið gæti verið nokkur athygli á ráshópi Haraldar í dag fyrir utan þá staðreynd að erlendir fjölmiðlar hafa staldrað við þá staðreynd að Íslendingur sé nú með í fyrsta skipti í langri sögu mótsins. 

Í morgun hefur rignt í Carnoustie og aðstæður því aðeins frábrugnar því sem var í gær en vindurinn er ekki mikill enn sem komið er. Samkvæmt spánni gæti rignt þegar Haraldur fer af stað en ætti að stytta upp um kl 17. 

• Blogga um frétt