Atvinnukylfingurinn Guðrún Brá Björgvinsdóttir tryggði sér í dag þátttökurétt í Evrópumótaröðinni með góðum árangri á lokaúrtökumótinu. Guðrún lék fimmta og síðasta hringinn sinn í dag.
Guðrún lék hringina fimm á samanlagt þremur höggum yfir pari og endaði hún í 17. sæti. Efstu 20 kylfingarnir fá keppnisrétt í flokki 9b á næsta keppnistímabili. Mótaröðin er sú sterkasta í Evrópu.
Alls hafa fjórar íslenskar konur komist inn á Evrópumótaröðina. Ólöf María Jónsdóttir var sú fyrsta, Ólafía Þórunn Kristinsdóttir var önnur í röðinni og Valdís Þóra Jónsdóttir sú þriðja.
Valdís Þóra er einnig með keppnisrétt á mótaröðinni á tímabilinu, en það hefst í lok febrúar með móti í Ástralíu.