Oddur og Ernir svo gott sem fallnir

Botnliðið Emsdetten í 1. deild Þýskalands í handbolta beið lægri hlut gegn Lemgo í dag 38:29. Emsdetten hefur aðeins 7 stig í 18. sæti, 10 stigum á eftir Bergischer sem er í 15. sæti, en þrjú neðstu lið deildarinnar falla. Emsdetten er því svo gott sem fallið í 2. deild.

Ernir Hrafn Arnarson skoraði 3 mörk fyrir Emsdetten í dag en Oddur Gretarsson komst ekki á blað. Ólafur Bjarki Ragnarsson er úr leik hjá Emsdetten eftir að hafa slitið krossband í hné fyrr í vetur.

Þá vann Balingen-Weilstetten mikilvægan sigur á Eisenach í fallbaráttunni 29:22. Bjarki Már Elísson skoraði 5 mörk fyrir Eisenach en Hannes Jón Jónsson var ekki meðal markaskorara. Aðalsteinn Eyjólfsson þjálfar Eisenach sem er í 17. sæti 1. deildarinnar með 11 stig og útlitið dökkt í fallbaráttunni. Balingen komst með sigrinum upp í 16 stig og er nú aðeins einu stigi frá Bergischer sem er í 15. sæti.

Í 2. deild Þýskalands gerði Grosswallstadt jafntefli við Hildesheim, 25:25. Fannar Friðgeirsson skoraði 3 mörk fyrir Grosswallstadt en Sverre Andreas Jakobsson skoraði ekkert mark fyrir liðið.

Þá vann Friesenheim sigur á Aue í 2. deildinni, 26:21. Árni Sigtryggsson skoraði 5 mörk fyrir Aue í leiknum og Bjarki Már Gunnarsson 2. Sigtryggur Rúnarsson var ekki meðal markaskorara en Sveinbjörn Pétursson markvörður leikur einnig með liðinu sem er þjálfað af Rúnari Sigtryggssyni.

• Blogga um frétt