„Ekkert er heitara í handboltaheiminum um þessar mundir heldur en íslenskir þjálfarar,“ er fullyrt í grein hjá sænska blaðinu Aftonbladet.
Þar er til umfjöllunar að Kristján Andrésson sé í viðræðum við sænska handknattleikssambandið um að taka við sænska karlalandsliðinu.
Með þessari skemmtilegu fullyrðingu er bent á árangur þeirra Dags Sigurðssonar, Guðmundar Guðmundssonar og Þóris Hergeirssonar á árinu og einnig er minnst á að Alfreð Gíslason sé hjá stórveldinu Kiel. Aftonbladet tekur þó fram að upptalningin gæti verið lengri en þessir fjórir.
Kristján þjálfaði áður Guif í Svíþjóð og spilaði í Svíþjóð allan sinn feril. Hann lék með íslenska landsliðinu um tíma, var til dæmis í liði Íslands á Ólympíuleikunum í Aþenu 2004.
Staffan Olsson og Ola Lindgren láta af störfum sem þjálfarar landsliðsins en Ljubomir Vranjes og Magnus Andersson, fyrrverandi landsliðsmenn Svía, hafa báðir hafnað landsliðsþjálfarastarfinu.