Handknattleiksdómararnir Svavar Ólafur Pétursson og Arnar Sigurjónsson munu dæma leik í Meistaradeild Evrópu um helgina.
Um er að ræða leik Nantes frá Frakklandi og Besiktas frá Tyrklandi, í D-riðli Meistaradeildar karla. Það er vefsíðan Fimmeinn.is sem greinir frá þessu.
Arnar og Svavar hafa áður dæmt í Meistaradeildinni, árið 2013, bæði í karla- og kvennaflokki.
Ólympíufararnir Anton Gylfi Pálsson og Jónas Elíasson dæma einnig í Meistaradeildinni á þessari leiktíð en þeir dæmdu leik Flensburg og Veszprém um síðustu helgi.