Dagur Sigurðsson og Guðmundur Guðmundsson munu mætast með landslið sín í úrslitaleik um farseðilinn í undanúrslit Asíumótsins í handknattleik á morgun.
Japan, undir stjórn Dags, og Barein, undir stjórn Guðmundar, eru saman í milliriðli mótsins sem fram fer í Suður-Kóreu. Eftir tvo leiki eru liðin jöfn með tvö stig og mætast í lokaumferðinni þar sem sæti í undanúrslitunum er undir.
Barein vann Sameinuðu arabísku furstadæmin í gær en tapaði fyrir Katar í dag. Staðan í hálfleik var 13:11 fyrir Katar sem að lokum vann átta marka sigur, 29:21. Katar er með fullt hús stiga í milliriðlinum.
Japan tapaði fyrir Katar í gær en vann öruggan sigur á Sameinuðu arabísku furstadæmunum í dag. Staðan í hálfleik var 14:9 og sigurinn var aldrei í hættu eftir hlé, lokatölur 27:20 og Japan krækti í sín fyrstu tvö stig.
Tvö af liðunum fjórum í riðlinum komast áfram í undanúrslit og hefur Katar þegar tryggt sæti sitt þar. Dagur og Guðmundur munu því bítast um hinn farseðilinn áfram.