Franska liðið Nantes vann Skjern 33:27 og Kiel tapaði heima gegn Vardar frá Makedóníu 29:28 í fyrri viðureignum liðanna í 8-liða úrslitum Meistaradeildar Evrópu í handknattleik í dag.
Tandri Már Konráðsson og félagar í danska liðinu Skjern máttu sætta sig við sex marka tap í Frakklandi en liðið sló ungverska stórliðið Veszprém í 16-liða úrslitunum. Tandri Már skoraði ekki mark í dag en lét talsvert til sín taka í vörninni.
Alfreð og lærisveinar hans í Kiel töpuðu með eins marks mun gegn Vardar í Þýskalandi og eiga því mikið verk fyrir höndum.