Þjóðverjar verða aðeins með tvö lið í Meistaradeild karla í handknattleik á næstu leiktíð, þ.e. meistaralið Flensburg og Rhein-Neckar Löwen.
Ósk Füchse Berlín um að fá sérstakan keppnisrétt, „wild card“, var hafnað af Handknattleikssambandi Evrópu, EHF. Óskum SKA Minsk og Gorenje um sæti í deildinni var einnig hafnað.
Þrjú frönsk lið verða með í keppninni, Evrópumeistarar Montpellier og Nantes auk Frakklandsmeistara PSG.
Danmerkurmeistarar Skjern, sem Björgvin Páll Gústavsson og Tandri Már Konráðsson leika með á næstu leiktíð, verða annað hvort í A eða B-riðli eftir að hafa verið í C-riðli á síðustu leiktíð. Sænska meistaraliðið Kristianstad heldur einnig sæti sínu í A eða B-riðli.