Rhein-Neckar Löwen þurfti svo sannarlega að hafa fyrir því að komast í átta liða úrslit þýsku bikarkeppninnar í handknattleik þegar liðið sótti Bergsicher heim í Íslendingaslag í kvöld.
Leikurinn var æsispennandi. Arnór Þór Gunnarsson kom Bergischer yfir í 24:23 með marki úr vítakasti þegar tvær og hálf mínúta var eftir en Alexander Petersson jafnaði metin og tryggði Löwen framlengingu þegar tæp ein og hálf mínúta var til leiksloka.
Í framlengingunni reyndist Löwen sterkari og innbyrti sigur 32:29 en Löwen er ríkjandi bikarmeistari. Arnór Þór skoraði 6 mörk fyrir Bergischer. Alexander skoraði 3 af mörkum Löwen en Guðjón Valur Sigurðsson kom ekkert við sögu í leiknum.