Haukur Þrastarson, landsliðsmaður í handbolta og einn efnilegasti leikmaður Evrópu, hefur skrifað undir þriggja ára samning við pólsku meistarana í Kielce, eins og mbl.is greindi frá fyrr í dag.
Haukur, sem er aðeins 18 ára, er spenntur fyrir félagsskiptunum, en hann gengur í raðir pólska félagsins eftir leiktíðina hér heima.
„Þeir sýndu mikinn áhuga á að fá mig og ég kíkti á þá, skoðaði aðstöðuna, átti samtöl við þjálfara og fleiri þarna úti og mér leist vel á og ég tel að það sé gott skref á mínum ferli að fara þangað,“ sagði Haukur í samtali við mbl.is. Honum leist vel á aðstæður hjá félaginu.
„Ég er búinn að fara þangað tvisvar og mér leist mjög vel á allt. Það eru flottar aðstæður, mikil stemning á leikjum hjá þeim, góðir áhorfendur og toppþjálfarar. Hópurinn er ungur en mjög flottur.“
Þjálfari Kielce er hinn skrautlegi Talant Dujshebaev, sem meðal annars sló Guðmund Guðmundsson, núverandi landsliðsþjálfara Íslands, í punginn er þeir mættust á hliðarlínunni í Meistaradeild Evrópu árið 2014. Haukur ber honum hins vegar vel söguna.
„Ég hef átt gott samtali við hann og hitt hann tvisvar. Það vita allir að þetta er toppþjálfari og ég efast ekki um að ég geti lært mikið af honum. Ég er mjög spenntur að fá að vinna með honum,“ sagði Haukur.
Annar Selfyssingur, Þórir Ólafsson, lék með liði Kielce frá 2011 til 2014. „Ég þekki Þóri mjög vel og hef unnið með honum. Það var gott að geta leitað til hans og við áttum gott spjall.“
Haukur gerir þriggja ára samning við Kielce, en hvað ætlar hann að gera á þremur árum í Póllandi?
„Ég ætla fyrst og fremst að einbeita mér að því að klára tímabilið hér heima með Selfossi. Svo vil ég komast inn í liðið úti og stimpla mig inn. Þetta er krefjandi skref, ég geri mér grein fyrir því. Þetta er hörkulið og eitt það besta í heimi en markmiðið er að gera góða hluti með liðinu,“ sagði Haukur, sem viðurkennir að mörg félög hafi haft samband við sig.
„Ég hafði mikið af spennandi möguleikum en eftir að ég fór út og kíkti á Kielce, þá leist mér mjög vel á. Það voru margir aðrir spennandi kostir en þetta er rétta skrefið fyrir mig,“ sagði Haukur.
Kielce er ríkjandi pólskur meistari en liðið hefur hampað meistaratitlinum átta ár í röð og hefur orðið bikarmeistari síðustu 11 árin. Liðið vann sigur í Meistaradeild Evrópu fyrir þremur árum. Liðið er sem stendur í öðru sæti pólsku deildarinnar, þremur stigum á eftir Wisla Plock eftir ellefu umferðir. Þá er liðið í fjórða sæti í B-riðli Meistaradeildarinnar.