„Ósanngjarnt að spila um þriðja sætið“

Louis van Gaal, landsliðsþjálfari Hollendinga, segir það ósanngjarnt að það þurfi að spila um þriðja sætið á stórmótum í knattspyrnu. Það verður einmitt hlutskipti Hollendinga á laugardag þegar liðið mætir Brasilíu.

„Þetta er leikur sem á ekki að vera spilaður. Ég hef sagt það núna í áratug; það er ósanngjarnt. Það er einungis ein verðlaun sem skipta máli og það er að verða heimsmeistari,“ sagði van Gaal.

Leikur um þriðja sætið var tekinn upp á heimsmeistaramótinu á Ítaliu árið 1934 en hefur lengi verið þyrnir í augum þeirra sem tapa undanúrslitaleik.

„Í mótum þar sem þú hefur spilað vel ferðu engu að síður heim án titils ef þú tapar í undanúrslitum, en síðan þarftu gíra þig upp til þess að spila um þriðja sætið líka,“ sagði ósáttur van Gaal.

Louis van Gaal vill ekki leik um þriðja sætið. AFP

• Blogga um frétt