Suður-Kóreubúar verða án þjálfara síns, Paulo Bento, þegar þeir mæta Portúgal í lokaumferðinni í H-riðli heimsmeistaramótsins í knattspyrnu í Katar.
Bento, sem er Portúgali og missir því af því að mæta löndum sínum, fékk rauða spjaldið frá Anthony Taylor dómara strax eftir að leikur Suður-Kóreu og Gana var flautaður af í Al Rayyan í dag.
Gana vann leikinn, 3:2, en Taylor flautaði til leiksloka eftir að Suður-Kóreubúar höfðu fengið hornspyrnu, sína tólftu í leiknum.
Bento hellti úr skálum reiði sinnar yfir Taylor en uppskar ekkert annað en rautt spjald og leikbann.
Hann var þjálfari portúgalska landsliðsins um fjögurra ára skeið, frá 2010 til 2014.