Liðið lítur betur út núna en fyrir mótið

„Ég er virkilega stoltur af því hvernig liðið nálgaðist leikinn. Leikmenn voru með hárrétt spennustig og mættu hungraðir til leiks. Ólafur [Andrés Guðmundsson] var sterkur í fyrri hálfleik, en það hefði verið gott ef einhver hefði tekið við keflinu þegar dró af honum í seinni hálfleik,“ sagði Stefán Árnason, þjálfari karlaliðs Selfoss í handbolta, eftir tap íslenska karlalandsliðsins í handbolta gegn Frakklandi í 16 liða úrslitum HM á laugardaginn.

„Þegar þú bætir Aroni Pálmarssyni við þann kjarna sem myndaðist í þessu móti þá getur maður litið björtum augum til framtíðar. Eftir tvö til þrjú ár getum við verið komnir á sama stall og bestu þjóðir heims og liðið lítur betur út á þessum tímapunkti en fyrir mótið. Mér fannst Rúnar Kárason standa sig heilt yfir best á mótinu,“ sagði Stefán um framhaldið.