Skautafélag Akureyrar, Íslandsmeistarar karla í íshokkíi, heldur til Búlgaríu á miðvikudag þar sem liðið tekur þátt í Evrópukeppni. SA fer þangað með gott veganesti eftir að hafa unnið fyrsta titil tímabilsins hér heima.
Nýrri bikarkeppni Íshokkísambandsins, Lýsis-bikarnum, lauk með sigri SA. Liðin þrjú á Íslandsmótinu mættust heima og heiman og vann SA þrjá leiki en tapaði einum, líkt og Björninn, en SA var með betri markatölu og fékk því Lýsisbikarinn.
Hið sáluga félag Esja varð fyrsta íslenska félagið til að taka þátt í Evrópukeppni á síðasta ári. SA er í riðli með Irbis-Skate Sofia frá Búlgaríu, Zeytinburnu Istanbul frá Tyrklandi og HC Bat Yam frá Ísrael. Leikirnir fara fram 28.-30. september í Sofiu, höfuðborg Búlgaríu. Efsta liðið fer áfram í 2. umferð sem fram fer í Riga í Lettlandi um miðjan október.