Haukur fékk gæsahúð undir þjóðsöngnum

„Ég hef leyft mér að dreyma stóra drauma varðandi körfuboltann og mig hefur dreymt um að komast á stórmót með landsliðinu. Nú er draumurinn einfaldlega orðinn að veruleika,“ sagði Haukur Helgi Pálsson sem hefur verið í stóru hlutverki hjá körfuboltalandsliðinu í undankeppni EM þrátt fyrir að vera nýskriðinn yfir tvítugt. 

Haukur skoraði 9 stig og tók 9 fráköst þegar Ísland tapaði með átta stiga mun fyrir Bosníu í Laugardalshöll í kvöld. 

„Við höfum sýnt í leikjum á móti stórum þjóðum í sumar og einnig fyrir tveimur árum að við eigum fullt erindi í bestu liðin,“ sagði Haukur og hann sagði stemninguna í Höllinni hafa verið magnaða. 

„Það var frábært að spila fyrir fullri Laugardalshöll og maður fékk gæsahúð að heyra áhorfendur syngja með þjóðsöngnum,“ sagði Haukur Helgi Pálsson. 

• Blogga um frétt