Þór Þorlákshöfn er komið í 8-liða úrslit í bikarkeppni karla í körfuknattleik eftir 93:70 sigur á Keflavík í 16-liða úrslitum í dag.
Leikurinn var jafn og spennandi framan af í Keflavík í dag og voru heimamenn með eins stigs forystu að loknum fyrri hálfleik, 42:41.
Þórsarar fóru á flug í seinni hálfleik og að loknum þremur leikhlutum voru gestirnir komnir með ágæta forystu, 65:57. Gestirnir settu svo í fluggírinn í lokaleikhlutanum og unnu öruggan sigur eins og áður sagði.
Tobin Carberry var langstigahæstur gestanna með 34 stig en Guðmundur Jónsson og Magnús Már Traustason skoruðu 18 stig hvor fyrir Keflvíkinga.