Körfuknattleiksmaðurinn Kristinn Pálsson hefur komist að samkomulagi um að ganga til liðs við uppeldisfélag sitt, Njarðvík, og leika með liðinu næstu tvö og hálft árið. Þetta kemur fram í frétt á karfan.is.
Kristinn hefur verið við nám í Marist háskólanum í rúm tvö ár og leikið með körfuboltaliði skólans. Kristinn ákvað að koma heim á þessum tímapunkti af persónulegum ástæðum og mun leika með Njarðvík á komandi misserum.
Njarðvík er í fimmta sæti Dominos-deildar karla í körfubolta með 14 stig nú þegar jólafrí verður gert á deildinni. Næsti deildarleikur Njarðvíkur er gegn KR 4. janúar næstkomandi og verður Kristinn að öllum líkindum í leikmannahópi Njarðvíkur í þeim leik.