Körfuknattleiksmaðurinn Logi Gunnarsson ætlar að leggja landsliðsskóna á hilluna að loknum landsleiknum við Tékka á sunnudaginn í Laugardalshöll en viðureignin er liður í undankeppni heimsmeistaramótsins.
Logi staðfesti þetta í samtali við Vísi í dag. Hann á 146 landsleiki að baki á átján árum og er fjórði leikjahæsti landsliðsmaður Íslands í körfuknattleik.
Íslenska landsliðið leikur tvo leiki í undankeppni HM á næstunni. Fyrri viðureignin verður við Finna í Laugardalshöll á föstudagskvöld og sú síðari á móti Tékkum á sunnudag á sama stað.