„Þetta er saga vetrarins, þetta er mitt lið. Við erum andlausir og hreinlega veikir andlega," sagði Jóhann Þór Ólafsson, þjálfari Grindavíkur, eftir 114:83-tap gegn Tindastóli í öðrum leik liðanna í átta liða úrslitum Dominos-deildar karla í körfubolta í kvöld.
Leikurinn var þokkalega jafn, þangað til í 4. leikhluta, en þá valta Tindastólsmenn hreinlega yfir Grindavík.
„Við vorum að búa til opin skot í byrjun en erum ekki að hitta svo hrynur þetta hjá okkur. Við vorum inni í þessu í fyrri hálfleik. Þetta eru ekki nema níu stig í hálfleik en svo missum við hægt og bítandi trúna."
„Við eigum erfitt með að fylgja leikplani og þetta var saga tímabilsins í hnotskurn," sagði Jóhann. Tindastóll vann 3. leikhlutann 36:14, en fannst honum sínir menn gefast upp í lokin? „Já í rauninni. Ég ætla ekki að fara í einhver smáatriði en við erum veikir andlega og eigum erfitt með að fylgja plani."
Fyrsti leikurinn í einvíginu á Sauðárkróki var jafn og spennandi og fór í framlengingu.
„Það er svekkjandi hvað var stór munur á milli liðsins í dag og á föstudaginn. Við vorum hörkugóðir þá en hentum því frá okkur. Það svíður mest."
„Hvort sem það er hér eða annars staðar, að mínu mati er þetta ekki getumunurinn á liðunum. Þeir voru hörkugóðir í dag og hittu vel á meðan að þetta var ofan í og upp úr hjá okkur. Í vörninni erum við líka hræðilegir."
Ljóst er að Grindavík er úr leik í úrslitakeppninni, spili liðið ekki mikið betur í þriðja leiknum næstkomandi föstudag.
„Við verðum að sýna hugrekki og karakter og mæta ferskir á föstudaginn á Krókinn. Maður tekur kvöldið í kvöld að melta þetta. Við gefumst alls ekki upp," sagði Jóhann að lokum.