LeBron James náði í oddaleik

Cleveland Cavaliers vann tíu stiga heimasigur á Boston Celtics, 109:99, er liðin mættust í sjötta leik sínum í undanúrslitum NBA-deildarinnar í körfubolta í nótt. Staðan í einvíginu er nú jöfn, 3:3, og oddaleikur fram undan á heimavelli Boston.

Boston fór betur af stað og vann fyrsta leikhlutann 25:20, en Cleveland svaraði með stórsigri í 2. leikhluta og var staðan í hálfleik 54:43, Cleveland í vil, og þann mun náði Boston aldrei að vinna upp. 

LeBron James sýndi mátt sinn og megin hjá Cleveland, hann skoraði 46 stig og tók 11 fráköst og gaf auk þess níu stoðsendingar. Terry Rozier gerði 28 stig fyrir Boston. 

• Blogga um frétt