Elvar Már Friðriksson, landsliðsmaður í körfuknattleik, mun leika með Njarðvíkingum út tímabilið en þetta var staðfest á heimasíðu UMFN í morgun.
Elvar sem síðustu fjögur ár spilaði í háskólaboltanum í Bandaríkjunum hóf keppnistímabilið sem atvinnumaður hjá Denan í Frakklandi en skipulagsbreytingar hjá liðinu urðu þess valdandi að samningi við Elvar var sagt upp.
Elvar hugðist halda áfram í atvinnumennskunni en hugur hans leitaði líka heim. Úr varð að Elvar gerði samning til loka tímabils og mun því að öllum líkindum spila með Njarðvíkingum gegn Grindavík á morgun í Dominos-deildinni.
Ljóst er að Elvar verður uppeldisfélagi sínu mikill liðsstyrkur en Njarðvíkingar hafa farið býsna vel af stað í upphafi tímabilsins.