Köfuknattleiksdeild Álftaness hefur gert samning við Bandaríkjamanninn Sam Prescott um að leika með liðinu á næsta tímabili. Prescott þekkir vel til körfuboltans á Íslandi. Hann hefur áður leikið með Fjölni og Hamar með góðum árangri.
Þau tvö tímabil sem hann hefur leikið hér á landi hefur hann samanlagt skilað að meðaltali 29.2 stigum, 8.6 fráköstum, 3.5 stoðsendingum og 2 stolnum boltum. Prescott er frá Fíladelfíu í Bandaríkjunum og spilaði háskólabolta í Mount St. Mary's háskólanum í Maryland við góðan orðstír þar til hann hélt til Hamars haustið 2015.
Hrafn Kristjánsson, þjálfari Álftaness: „Við erum ungt félag sem er að leika í fyrsta skipti í 1. deild. Í ljósi þess fannst okkur mikilvægt að ráða til okkar leikmann sem væri nokkuð öruggt að myndi skila okkur góðu framlagi. Sam er þekkt stærð í þessari deild og mjög fjölhæfur leikmaður sem getur hjálpað okkur á margan hátt á báðum endum vallarins í baráttunni sem bíður okkar.“
Huginn Freyr Þorsteinsson, formaður körfuknattleiksdeildar Álftaness: „Það er mikill fengur fyrir okkur að fá Sam til liðs við okkur fyrir átök komandi vetrar. Þá mun Sam einnig vinna með okkur að uppbyggingu körfuboltans í yngri flokkum en við ætlum að efla það starf verulega í vetur.“