Enex skipt upp

Frá uppbyggingu hitaveitna í Kína
Frá uppbyggingu hitaveitna í Kína

Samkomulag hefur tekist milli eigenda Enex um uppskiptingu félagsins. Uppskiptingin hefur verið staðfest á hluthafafundi í félaginu og af stjórnum stærstu eigendanna, Reykjavik Energy Invest, REI, dótturfélags Orkuveitu Reykjavíkur og Geysis Green Energy, GGE. Enex hefur verið í eigu GGE að 70% og REI að 26,5%. Þá hefur nokkur fjöldi aðila átt smærri hlut í Enex.
 
Með samkomulaginu eykur GGE hlut sinn í félaginu Enex Kína en það vinnur að uppbyggingu hitaveitna í Kína. Geysir er nú 75% hluthafi í Enex Kína og REI 25%. Þá yfirtekur GGE að fullu verkefni Enex í Þýskalandi og verður þannig leiðandi aðili í þróun jarðvarmaverkefna í Þýskalandi í gegnum verkefnafélag Enex þar í landi og dótturfélag sitt Exorku.
 
REI yfirtekur eignarhlut Enex í Iceland America Energy, sem unnið hefur að þróun verkefna á sviði jarðhita, fyrst og fremst í Kaliforníu. GGE mun áfram starfa af krafti í Bandaríkjunum þar sem félagið er leiðandi fjárfestir í tveim öðrum jarðhitafélögum.
 
Auk ofangreindra verkefna Enex, hafa REI og GGE unnið saman að verkefnum á Filippseyjum í félaginu Envent. Með samkomulaginu mun GGE eignast meirihluta í því félagi (80%) og tekur jafnframt við stjórn þess.
 
Ásgeir Margeirsson forstjóri GGE fagnar samkomulaginu og segir niðurstöðuna falla vel að þeim áherslum sem félagið hefur sett sér um virka þátttöku í vel skilgreindum verkefnum.

„Við viljum einbeita okkur að verkefnum þar sem við höfum leiðandi hlutverki að gegna líkt og við erum að gera með verkefnunum í Kína og á Filippseyjum. Um leið hverfum við frá öðrum sem ekki falla eins vel að starfsemi félagsins. Jafnframt gefur samkomulagið okkur tækifæri til hagræðingar. Þannig sjáum við mikla samlegð með jarðvarmaverkefnum Enex og Exorku í Þýskalandi. Mestu skiptir að taka forystu þar sem hennar er þörf,“ segir Ásgeir.

mbl.is

Bloggað um fréttina

Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK