Álverð hefur hækkað talsvert það sem af er júnímánuði, segir greiningardeild Íslandsbanka.
Á markaði ríkja þó ákveðnar efasemdir um að hækkunin sé komin til að vera, bendir hún.
Við lokun markaða í London í gær stóð verð á gæðaáli í 1.674 dollurum á tonnið. Hefur álverð þar með hækkað um 18% frá upphafi mánaðar í dollurum talið, en frá áramótum nemur hækkunin 12%.
Meðal skýringa á hækkuninni er nefnt til sögunnar væntingar um að mörg stærstu hagkerfa heims taki að rétta úr kútnum á seinni hluta ársins, framleiðslugeta hafi verið minnkuð talsvert undanfarin misseri, álbirgðir hafi lækkað hjá ýmsum stórnotendum áls á borð við Japan og að minnkandi áhættufælni á fjármálamörkuðum hefur almennt stutt við hrávöruverð undanfarna mánuði, segir greiningardeildin.
Ýmsir sérfræðingar á markaði eru þó tortryggnir á undanfarna verðhækkun, ef marka má nýlegan pistil frá fréttaveitunni Reuters. Benda sérfræðingarnir á að álbirgðir séu enn miklar á heimsvísu.