Senda inn efni
Boeing 747-8 flugvél sem ætluð er Cargolux. Myndin er tekin af heimasíðu Boeing.
Nýrri útgáfu Boeing 747 reynsluflogið
Bandarísku flugvélaverksmiðjurnar Boeing ætla að reynslufljúga nýrri útgáfu af Boeing 747 risaþotu í kvöld. Um er að ræða 747-8 fragtflugvél, sem til stendur að afhenda flugfélaginu Cargolux í Lúxemborg þegar fram líða stundir en Cargolux hefur pantað 10 slíkar vélar hjá Boeing.
Að sögn talsmanna Boeing lét vélin vel að stjórn þegar henni var ekið á jörðu niðri á laugardag á Paine Field flugvellinum í Everett í Washingtonríki skammt frá höfuðstöðvum fyrirtækisins.
Boeing heldur því fram, að 747-8 fragtvélarnar muni draga úr rekstrarkostnaði flugfélaga og jafnframt muni hún menga mun minna en núverandi flugvélar. Flutningarýmið er 16% meira en í 747-400 fragtvélum og hún eyðir einnig 16% minna eldsneyti.
Boeing er einnig að þróa útgáfu af vélinni fyrir farþegaflutninga og nefnist hún 747-8 Intercontinental. Notuð er svipuð tækni og verður í 787 Dreamliner flugvélunum, sem brátt verða afhentar nýjum eigendum.
Upphaflega stóð til að afhenda nýju vélarnar sl. haust en ýmis vandamál hafa komið upp í framleiðslunni og einnig hafa verkföll sett strik í reikninginn. Nú stendur til að afhenda fyrstu 747-8 fragtvélarnar undir lok ársins.
Cargolux var stofnað árið 1970 af Íslendingum og Lúxemborgarbúum og var um tíma dótturfélag Loftleiða. Enn starfa margir íslenskir flugmenn hjá félaginu.
Til baka