Senda inn efni
Mikið tap á rekstri SAS
Tap á rekstri norræna flugfélagsins SAS nam nærri 3 milljörðum sænskra króna, jafnvirði 52 milljarða íslenskra króna. Þetta er mun verri afkoma en sérfræðingar bjuggust við en þeir höfðu spáð um 2 milljarða sænskra króna tapi.
Á síðasta ársfjórðungi nam tap á rekstrinum 1,52 milljörðum sænskra króna fyrir skatta samanborið við 360 milljóna króna tap á sama tímabili árið 2008.
SAS boðaði jafnframt í morgun, að farið yrði í nýtt hlutafjárútboð þar sem aflað verði 5 milljarða sænskra króna hlutafjár til að styrkja lausafjárstöðuna og reksturinn. Að sögn félagsins nýtur hlutafjáraukningin stuðnings norrænu ríkjanna þriggja, sem eiga hlut í félaginu, Svíþjóðar, Noregs og Danmerkur, og einnig sænsku Wallenberg fjölskyldunnar, sem er stærsti hluthafinn þar fyrir utan.
Að sögn fréttavefjar Børsen liggja fyrir nýjar sparnaðaráætlanir sem eiga að spara samtals 7,3 milljarða sænskra króna á þessu og næstu árum. M.a. stendur til að semja við flugmenn og annað starfsfólk um launalækkanir. Þá á að segja upp um 650 starfsmönnum.
Til baka