Senda inn efni
Lyf frá Ratiopharm.
Tveir tilboðsgjafar valdir
Verið er að velja tvo tilboðsgjafa í þýska lyfjafyrirtækið Ratiopharm, að sögn fréttaveitunnar Dow Jones en fjögur fyrirtæki lögðu inn tilboð í fyrirtækið í síðustu viku. Upplýst verður í byrjun næstu viku hvaða tvö fyrirtæki fái að leggja fram lokatilboð.
Að sögn Dow Jones eru fyrirtækin fjögur íslenska fyrirtækið Actavis, sænska fyrirtækið EQT, ísraelska fyrirtækið Teva og bandaríska fyrirtækið Pfizer. Reutersfréttastofan segir hins vegar að Actavis og EQT hafi lagt sameiginlega fram tilboð.
Dow Jones hefur eftir heimildarmönnum, sem sagðir eru þekkja vel til söluferlisins, að allt eins sé búist við að lokatilboðin hljóði upp á 3 milljarða evra. Það yrði þá stærsta yfirtaka á lyfjafyrirtæki frá því Teva keypti bandaríska fyrirtækið Barr fyrir 7,46 milljarða dala árið 2008.
Til baka