Actavis á leið úr landi

Líklegt er að yfirstjórn Actavis muni flytjast frá Íslandi á næstunni, ef marka má innanhússtölvuskeyti sem nýr forstjóri Actavis, Claudio Albrecht, sendi til allra starfsmanna fyrirtækisins í dag.

Albrecht tók í dag við starfi forstjóra fyrirtækisins af Sigurði Óla Ólafssyni, sem gegnt hefur starfi forstjóra í tvö ár. Sigurður tók við forstjórastarfinu af Róberti Wessman.

Í innanhússkeyti Albrecht segir: „Það er ljóst að í kjölfar yfirtöku fjölda fyrirtækja á síðasta áratug, er yfirstjórn Actavis staðsett í fimm löndum. Við erum í dag að leita að hentugri staðsetningu þar sem öll yfirstjórnin verður staðsett á sama stað," segir í skeytinu til starfsmanna Actavis á Íslandi.

Albrecht leggur hins vegar áherslu á að fyrirtækið muni áfram reka starfsemi á Íslandi:„Þið getið samt verið fullviss um að starfsemin á Íslandi mun áfram gegna lykilhlutverki framleiðslu, rannsóknum og þróun og Medis, sölu til þriðja aðila," segir í skeytinu.

Uppfært 11:29: Actavis vill koma því á framfæri að engar áætlanir eru uppi enn sem komið er að flytja heimilisfesti fyrirtækisins frá Íslandi.

• 1 blogg um fréttina

Bloggað um fréttina

• Guðni Gíslason: Innanhússpósti ?? Lesa blaðamenn ekki fréttatilkynningar sínar?