Methagvöxtur í Svíþjóð

Sænska hagkerfið óx á þriðja ársfjórðungi um 2,1% miðað við ársfjórðunginn á undan. Hagvöxturinn mældist hins vegar 6,9% ef miðað er við sama tímabil á síðasta ári. Er þetta mesti hagvöxtur, sem mælst hefur í landinu frá því byrjað vara að halda ársfjórðungslegar skrár árið 1970. 

TT fréttastofan hefur eftir Peter Buven, sérfræðingi hjá sænsku hagstofunni, að setja verði mikinn hagvöxt nú í samhengi við mikinn samdrátt, sem varð á síðasta ári en þá dróst verg landsframleiðsla saman um 5,4% á þriðja ársfjórðungi. 

Samt er hagvöxturinn nú sá mesti, sem mælst hefur í Svíþjóð. Á öðrum ársfjórðungi 1974 og á öðrum fjórðungi árið 2000 óx landsframleiðslan um 5,8% miðað við sama tímabil árið áður. Fyrir 1970 voru birtar árlegar tölur  um hagvöxt.

Hagvöxturinn nú var mun meiri en sérfræðingar hefðu spáð. Sænskur hagvöxtur á öðrum ársfjórðungi var einnig langt umfram væntingar sérfræðinga.  

• 1 blogg um fréttina

Bloggað um fréttina

• Sigurður Þórðarson: Ekkert Evruland nálgast Svíþjóð í hagvexti