Ríkið greiðir upp Norðurlandalánin

Ríkissjóður Íslands og Seðlabanki Íslands endurgreiða fyrirfram í dag lán frá Norðurlöndunum sem tekin voru í tengslum við efnahagsáætlun stjórnvalda sem studd var af AGS árið 2008. Um er að ræða endurgreiðslu að fjárhæð 735 milljónir evra, jafnvirði um 114 milljarða, sem voru upphaflega á gjalddaga á árunum 2019, 2020 og 2021. Þetta kemur fram í tilkynningu á vef Seðlabankans, en með þessu er að fullu búið að endurgreiða lán frá Norðurlöndunum sem samtals námu 1.775 milljónum evra. 

Ákvörðun um fyrirframgreiðslu kemur í framhaldi af skuldabréfaútgáfu ríkissjóðs á Evrópumarkaði sem tilkynnt var um 8. júlí síðastliðinn að fjárhæð 750 milljónir evra, eða jafnvirði 116 milljarða. Í tilkynningunni kemur fram að útgáfan hafi veitt svigrúm til að endurgreiða Norðurlandalánin, sem bera óhagstæðari vexti. Útgáfa ríkisjóðs og endurgreiðsla lána nú hefur ekki áhrif á hreinar skuldir ríkissjóðs og Seðlabankans saman, en heildarskuldir ríkissjóðs hækka um 1,9% af VLF aðallega vegna þess að hluta lántökunnar er varið til að greiða niður skuldir sem færðar voru hjá Seðlabankanum. Stærð gjaldeyrisforða er óbreytt vegna ofangreindrar skuldastýringar.

• 1 blogg um fréttina

Bloggað um fréttina

• Geir Ágústsson: Skuldirnar eru of miklar