Standard & Poor’s (S&P) hefur í dag breytt horfum sínum fyrir Tryggingamiðstöðina (TM) úr stöðugum í jákvæðar. Fjárhagsleg styrkleikaeinkunn félagsins BBB- er jafnframt staðfest en það er sama einkunn og S&P hefur veitt langtímaskuldbindingum íslenska ríkisins. Breyting á horfum fyrir TM er gerð í kjölfar þess að S&P breytti horfum sínum fyrir íslenska ríkið í jákvæðar þann 18. júlí,segir í fréttatilkynningu frá TM.
TM hefur frá árinu 2007 verið með styrkleikamat frá S&P, eitt íslenskra tryggingafélaga. Matið veitir TM tækifæri til að sækja vátryggingaviðskipti á erlenda markaði og er því mikilvægur liður í vaxtarmöguleikum félagsins, segir í tilkynningunni.
Í tilkynningu frá S&P kemur fram að kjarnaeinkunn TM sé BBB en vegna þess hversu stór hluti vátryggingarekstrar og fjárfestinga TM er á íslenskum markaði fylgi horfur félagsins horfum fyrir langtímaskuldbindingar íslenska ríkisins.