Um 50 norsk olíu- og orkufyrirtæki í Noregi hafa að undanförnu orðið fyrir barðinu á tölvuárásum og Öryggisstofnun Noregs (Nasjonal Sikkerhetsmyndighet) hefur varað 250 til viðbótar við mögulegum árásum, að því er fram kemur í frétt Aftenposten. Hlutverk NSM er meðal annars að fylgjast með og vara við tölvuárásum í Noregi.
Aldrei áður hafa jafn mörg norsk fyrirtæki orðið fyrir barðinu á tölvuþrjótum. Meðal annarra er Statoil, stærsta olíufélag Noregs. Ørjan Haraldstveit, yfirmaður fjölmiðlasamskipta hjá Statoil, segir að fyrirtækið hafi verið varað við og unnið sé að því að fara yfir öryggismál þess.