Sumarölið rann ljúflega í landann

Viking Sumaröl er nú uppseldur hjá framleiðandanum Vífilfelli eftir að yfir 42 þúsund lítrar af ölinu voru seldir í sumar. Sumarölið er hveitibjór kryddaður með kóríander og appelsínuberki og ljóst að Íslendingar hafa sótt mikið í ölið með grillmatnum í sumar.

Í tilkynningu frá Vífilfelli segir að Íslendingar sækist í auknum mæli í sumarbjóra. „Það má segja að við séum frumkvöðlar í þessum sumarbjórum hér á landi. Við vorum fyrstir þegar við settum Viking Sumarölið á markað fyrir þremur árum og það varð strax mjög vinsælt,“ segir Hreiðar Þór Jónsson, vörustjóri áfengis hjá Vífilfelli.

Hreiðar segir veðrið nú í sumar ekki hafa haft eins mikil áhrif á söluna og fyrri ár. „Salan í sumar hefur verið mjög góð þrátt fyrir að sólardagarnir hafi sennilega mátt vera fleiri. Í heildina erum við búnir að selja 42 þúsund lítra af Víking Sumaröli og varan er uppseld hjá okkur.“

• Blogga um frétt