Hægt væri að reka Landspítalann í þrjú og hálft ár fyrir þá fjármuni sem eytt var til leikmannakaupa í ensku úrvalsdeildinni í sumar. Hægt væri að smíða fjóra nýja togara fyrir þá upphæð sem greidd var fyrir dýrasta leikmanninn.
Lokað var fyrir félagaskipti knattspyrnumanna milli liða í stærri deildum Evrópu klukkan 22.00 að íslenskum tíma í gærkvöldi.
Gróflega má áætla að liðin 20 í ensku úrvalsdeildinni hafi eytt 835 milljónum punda á leikmannamarkaðnum í sumar samkvæmt útreikningum breska ríkisútvarpsins, BBC eða því sem nemur rúmum 163 milljörðum íslenskra króna. Það eru engir smáaurar en til samanburðar kostar rekstur Landspítalans um 45 milljarða á ári. Það væri því hægt að reka okkar ágæta sjúkrahús í rúmlega þrjú og hálft ár fyrir þá peninga sem eytt er í leikmannakaup í ensku úrvalsdeildinni.
Dýrustu einstöku kaupin í sumar gerði Manchester United þegar liðið klófesti Argentínumanninn Ángel di Maria fyrir 59,7 milljónir punda sem samsvarar tæpum 11,7 milljörðum króna. Til samanburðar þá hafa útgerðarfyrirtækið Samherji og Fisk Seafood nýlega samið um smíði fjögurra nýrra ísfisktogara. Smíði þessara fjögurra skipa mun kosta 10 milljarða króna. Í raun væri því hægt að smíða togarana og smábátaflota til viðbótar fyrir þá peninga sem United mun greiða fyrir Di Maria.
Næstdýrastur var Sílebúinn Alexis Sánchez sem Arsenal greiddi Barcelona fyrir 35 milljón pund eða um 6,8 milljarða króna. Fyrir þær krónur hægt að reka velflesta leikskóla Reykjavíkurborgar í eitt ár.
Manchester United eyddi mestu fé til leikmannakaupa í sumar, gróflega áætlað 150 milljónum punda eða tæpum 30 milljörðum króna. Fyrir þann pening gæti Icelandair staðgreitt tvær Boeing 737 MAX9 þotur.
Næst á eftir United yfir heildarfé til leikmannakaupa í sumar kemur Liverpool sem eyddi 117 milljónum punda eða 22,7 milljörðum króna og Chelsea er svo í 3. sæti og talið hafa eytt 91,3 milljónum punda eða 17,8 milljörðum króna.
Já, það væri margt hægt að gera fyrir þá peninga sem notaðir eru til leikmannakaupa en í sumar var sett enn eitt metið, aldrei hefur meiri fjármunum verið eytt í kaupin í ensku úrvalsdeildinni. En aðalmálið er auðvitað að fylgjast með hvernig þessir rándýru leikmenn standa sig - hvort að þeir standi undir þeim miklu væntingum sem gerðar eru til þeirra.