Verslunarrisinn Tesco hefur sagt upp fjórum yfirmönnum, m.a. framkvæmdastjóra keðjunnar í Bretlandi, eftir að í ljós kom að spá um hagnað fyrirtækisins var ofmetin um 250 milljónir punda, 49 milljarða króna, á hálfs árs tímabili.
Fyrirtækið hefur ákveðið að láta Deloitte rannsaka málið og hvaða áhrif það mun hafa á reksturinn. Málið hefur þegar valdið Tesco fjárhagstjóni en hlutabréf í fyrirtækinu hafa lækkað um 12,5% í dag.
„Það er vægt til orða tekið að þetta séu vonbrigði,“ segir Dave Lewis, forstjóri Tesco í samtali við BBC. Hann tók við stöðunni þann 1. september. Hann segir málið grafalvarlegt.
Lewis segir að „nokkur fjöldi“ starfsmanna hafi verið látinn taka pokann sinn vegna málsins.