Ísland er meðal stofnenda stefnumótandi bandalags evrópskra ráðstefnulanda. Tilgangurinn með stofnun bandalagsins, European National Convention Bureaux, er að styrkja stöðu landanna á alþjóðlegum samkeppnismarkaði.
Í fréttatilkynningu kemur fram að til þess að ná því markmiði þurfi að byggja upp samvinnu- og þekkingargrunn sem auðveldar meðlimum að nálgast lykilmarkaði með sameiginlegum aðgerðum.
„Samvinnan eflir samkeppnishæfni hvers lands fyrir sig og styrkir um leið staðfærslu Evrópu sem ráðstefnu- og viðburðaráfangastaðar innan alþjóðlegs ráðstefnumarkaðar,“ segir í tilkynningunni.
Gríðarleg samkeppni ríkir á milli heimsálfa að markaðssetja sig gagnvart ráðstefnuhöldurum. Aðild Íslands að bandalaginu styrkir samkeppnisstöðu landsins.
Ráðstefnuskrifstofan Meet in Reykjavík er þátttakandi í þróun bandalagsins. Í bandalaginu eru ásamt Íslandi; Þýskaland, Holland, Ísland, Finnland, Danmörk, Noregur, Austurríki, Sviss, Eistland, Tékkland, Svartfjallaland, Serbía, Slóvakía, Slóvenía, Ungverjaland og Pólland.