Liðsmenn spænska meistaradeildarliðsins Rayo Vallecano hafa heitið því að hjálpa 85 ára gamalli konu sem borin var út úr húsnæði sínu í síðustu viku.
Konan, Carmen Martinez, hafði búið í íbúðinni sinni í Vallecas hverfinu í Madrid, höfuðborg Spánar, í um fimmtíu ár. Hún var hins vegar borin út á föstudag þar sem hún hafði gengist í ábyrgð fyrir lán sem sonur hennar hafði tekið og ekki greitt af.
Paco Jemez, þjálfari liðsins, sagðist ekki geta horft upp á þetta aðgerðarlaus. „Þetta er ekki bara ég, heldur allir liðsmenn og klúbburinn í heild sinni. Við munum gera allt í okkar valdi til þess að hjálpa þessari konu þannig að hún geti lifað með reisn og finnist ekki sem hún sé alein í heiminum,“ sagði Jemez.
Rayo sigraði Celta Vigo 1-0 á sunnudag og studdu áhorfendur ákvörðun liðsins ákaft en margir héldu á lofti skiltum með stuðningsyfirlýsingum. Eftir að liðið gaf frá sér yfirlýsingu um efnið hét borgarstjóri Madridar, Ana Botella, því einnig að finna lausn á vanda Martinez, sem býr nú hjá barnabarni sínu.
Á síðasta ári seldu spænskir bankar 49.694 íbúðarhúsnæði nauðungarsölu en það var11,1 prósentustiga vöxtur frá fyrra ári.