Viðskipti | mbl | 19.12.2014 | 14:20

Hamstra vörur í verslunum

Rússar flykkjast í búðir og kaupa vörur áður en þær hækka frekar í verði. AFP

Almenningur í Rússlandi flykkist nú í verslanir og hamstrar ýmsar vörur sem fara síhækkandi í verði með hverjum deginum sem líður vegna falls rúblunnar.

Sala á innfluttum vörum hefur rokið upp þar sem neytendur keppast við að kaupa áður en verðið hækkar og eru klukkustunda langar biðraðir við búðarkassa orðnar algeng sjón.

Alþjóðleg stórfyrirtæki á borð við Ikea og Apple hafa neyðst til þess að hætta tímabundið sölu á ákveðnum vörum og stórhækka verð annarra á meðan barist er við að halda verðinu í takt við hríðfallandi gengi. Apple hækkaði til dæmis verð á iPhone 6 símum í Rússlandi um 25% en lokaði síðar fyrir vefverslun fyrirtækisins á svæðinu. Ikea stöðvaði þá einnig tímabundið sölu á eldhúsvörum- og húsgögnum en sala hefst aftur á morgun, þann 20. desember. Þá eru fyrirtækin General Motors, Jaguar, Land Rover og Audi búin að taka fyrir sendingar til landsins.

McDonald's hefur einnig hækkað verðið á Big Mac borgaranum um 2,2% samkvæmt frétt Bloomberg.

Verðlag hækkað um 25%

Almennt verðlag hefur alls hækkað um 25 prósent á árinu. Vladimír Pútín, forseti Rússlands, sagði í gær að Rússland myndi brátt ná að jafna sig í kjölfar verstu efnahagskrísu sem hefur riðið yfir landið undir hans stjórn. Pútín sagðist halda örugglega um stjórnartaumana, þrátt fyrir refsiaðgerðir Vesturveldanna og hrun rúblunnar.

Miklar sveiflur hafa verið á gengi rúblunnar í þessari viku og hækkaði rússneski seðlabankinn stýrivextina í 17%.

Í myndbandinu að neðan má sjá örtröðina í verslunum.