Verðlækkun skilað sér hratt og vel

Varasamt er að taka einfalt margfeldi af skráðu verði á heimsmarkaði og gengi Bandaríkjadals á hverjum tíma þegar skoðuð er lækkun á eldsneytisverði. Þetta segir forstjóri Olíuverslunar Íslands vegna orða framkvæmdastjóra Félags íslenskra bifreiðaeigenda.

Runólfur Ólafsson, framkvæmdastjóri FÍB, hefur meðal annars sagt að hægt sé að lækka dísilolíu meira. Í tilkynningu frá Jóni Ólafi Halldórssyni, forstjóra Olíuverslunar Íslands, segir að taka verði tillit til fleiri breyta en aðeins lækkunar á heimsmarkaðsverði, t.d dreifingarkostnaði, afsláttum og birgðum. „Vert er að hafa í huga að álagning á eldsneyti er frjáls eins og í þeim löndum sem við berum okkur helst saman við. Þegar borið er saman eldsneytisverð á Íslandi og í nálægum löndum s.s. Danmörku, kemur í ljós að það er ekki mikill munur á verðinu. Í dag er algengt verð í sjálfsafgreiðslu hjá Olís 212,90 ísk/l á meðan verð í Kaupmannahöfn er 10,10 dkr/l sem leggur sig á 210 ísk/l (gengi 20,8 ísk/dkr). Ennfremur skal geta þess að verð á eldsneyti hjá Olís og ÓB hefur lækkað um tæpar 40 kr/l á undanförnum vikum og er það okkar mat að verðlækkun á eldsneyti hafi skilað sér hratt og öllu hagkerfinu hér til góða.“

Jón Ólafur bendir jafnframt á að 53% af bensínverði á Íslandi sé til komið vegna skattlagningar eða um 113 kr/l. „Ísland er eyja í Norður-Atlantshafi og aðflutningar til landsins eru hlutfallslega dýrari en fyrir þær þjóðir sem búa á meginlandi Evrópu, og jafnvel í Skandinavíu sem við berum okkur oftast saman við. Til viðbótar þessu þá erum við fámenn þjóð í tiltölulega strjálbýlu landi þar sem eldsneytisdreifing er mjög dýr, í það minnsta dýrari en í þéttbýlum löndum eins og Danmörku. Þjónustustig við bíleigendur hér á landi er mjög hátt. Hér er þéttleiki bensínstöðva mikill eins og margoft hefur komið fram á undanförnum árum og eldsneytisverð er það sama um allt land. Verðsamkeppni er mikil hér á landi og hart barist um hylli viðskiptavina eins og tilboð og tryggðakerfi sýna vel fram á.“

• Blogga um frétt