„Okkur fannst vera skortur á tækifærisgjöfum handa karlmönnum og vörum til þess að hirða allt þetta fína skegg sem er komið í umferð“ segir Einar Óskar Sigurðsson, sem á dögunum opnaði vefverslunina Hannah.is ásamt kærustu sinni, Heiðrúnu Örnu Friðriksdóttur.
Einar og Heiðrún hafa unnið að opnun verslunarinnar undanfarnar vikur, samhliða því að vera í fullu starfi og sinna börnum sínum fjórum. „Okkur langaði að gera eitthvað skemmtilegt saman. Við höfum því nýtt kvöldin og helgarnar í það að stússa í þessu,“ segir Einar.
Hugmyndina fengu þau fyrir nokkru síðan, en að sögn Einars var undirbúningsferlið ekki langt. „Við kýldum bara á þetta og lögðumst yfir internetið,“ segir hann, en verslunina opnuðu þau þann 28. nóvember sl. Einar hefur starfað í vefgeiranum um nokkurt skeið og þekkir vel inn á vefverslanir, svo fyrirstaðan var engin.
Verslunin býður upp á gæðavörur, keyptar beint frá hönnuði eða framleiðanda milliliðalaust. „Við fundum hluti sem okkur fannst fallegir og völdum þá hönnuði sem okkur leist best á. Markmiðið til að byrja með var að vera aðeins með tíu vörur en svo fundum við bara svo margt fallegt að við breyttum því fljótt,“ segir Einar, og bætir við að það verði á bilinu 15-20 vörur í vefversluninni hverju sinni.
„Við erum með langan lista af vörum sem okkur langar að setja inn, en við erum að prófa okkur áfram. Markmiðið er að vera lifandi og ekki alltaf með sömu vörurnar í boði.“
Hjúin leggja mikið upp úr því að vera samkeppnishæf við verðin úti, og segir Einar það ganga upp þar sem verslunin er einungis á netinu. „Við getum haldið vöruverðinu niðri því við erum ekki með sömu álagningu og verslanir með mikla yfirbyggingu.“
Vefsíðan er mjög notaleg, og segir Einar markmiðið vera það að fólk fái sömu upplifun og það fær þegar það labbar inn í notalega verslun. „Við leggjum mikið upp úr persónulegri þjónustu og reynum að nálgast kúnnann af sömu virðingu og vinsemd og kaupmaðurinn við búðarborðið.“
Að sögn Einars hafa viðtökurnar verið gríðarlega góðar. „Þetta er nánast að springa áður en mesta jólatraffíkin er hafin og margar vörur uppseldar í bili. En það er að sjálfsögðu lúxusvandamál.“ Þá segir hann stærstan hluta kúnnahópsins hafa verið konur að versla gjafir fyrir karlmenn en mikið sé um að karlar séu að leita sér að góðum náttúrulegum vörum til þess að hirða skeggið.
Loks segir hann stefnuna vera setta á það að opna fleiri sérhæfðar vefverslanir með persónulegri þjónustu á nýja árinu. „Önnur einföld verslun með hlýlegan og þægilegan anda mun að öllum líkindum opna fljótlega á árinu 2015.“