RARIK hagnast um 2,7 milljarða

Hagnaður RARIK nam 2,7 milljörðum króna á árinu 2014 og var töluvert umfram það sem gert var ráð fyrir í áætlunum. Hækkun frá árinu 2013 var tæp 37% en þá var hagnaður ársins um 1,9 milljarðar króna. Gert er ráð fyrir að hagnaður verði minni á næsta ári.

Rekstrarhagnaður fyrir afskriftir, fjármagnsliði og skatta (EBITDA) var 4,7 milljarðar króna eða 37,7% af veltu tímabilsins, samanborið við 36,5% á árinu 2013. Handbært fé frá rekstri var 3,8 milljarðar króna. Rekstrartekjur hækkuðu um rúm 6% frá árinu 2013 og voru 12,5 milljarðar króna og rekstrargjöld hækkuðu á milli ára um tæp 4,5% og voru 9,5 milljarðar króna.

Fjárfestingar fyrir 2,5 milljarða

Áhrif Landsnets, sem er hlutdeildarfélag RARIK, á afkomu ársins voru jákvæð um 847 milljónir króna á móti 491 milljón á árinu 2013. Samkvæmt efnahagsreikningi námu heildareignir RARIK í árslok 48,5 milljörðum króna og hækkuðu um 1,7 milljarða króna á milli ára. Heildarskuldir námu 19 milljörðum króna og lækkuðu um 602 milljónir króna frá fyrra ári. Eigið fé var 29,5 milljarðar króna og er eiginfjárhlutfall því 61% samanborið við 58% í árslok 2013.

Fjárfestingar ársins voru 2,5 milljarðar króna, sem er um 1,2 milljörðum króna lægri fjárhæð en árið á undan. Skýrist það fyrst og fremst af mjög miklum fjárfestingum við hitaveitu á Skagaströnd og við rafvæðingu fiskimjölsverksmiðja á árinu 2013.

Stjórn RARIK ohf. hefur lagt til við aðalfund að greiddar verði 310 milljónir króna í arð til ríkissjóðs. 

Áætlanir ársins 2015 gera ráð fyrir að forgangsorka aukist frá fyrra ári, en að dreifing raforku standi í stað.

RARIK ohf., sem er hlutafélag í eigu ríkisins, var stofnað 1. ágúst 2006 og tók þá við rekstri Rafmagnsveitna ríkisins sem hófu starfsemi sína 1. janúar árið 1947.

• Blogga um frétt