Vísitala neysluverðs hækkar mikið milli mánaða eða um 1,02% frá febrúar. ASÍ bendir á að vísitalan hafi ekki hækkað jafn mikið milli mánaða í tvö ár og er ársverðbólgan nú 1,6%. Verðbólgan er þó enn undir 2,5% verðbólgu markmiði Seðlabankans. Síðustu þrjá mánuði hefur vísitala neysluverðs hækkað um 1,0% en á ársgrundvelli samsvarar það 3,9% verðbólgu á ári líkt og kemur fram í tilkynningu Hagstofunnar.
Helstu skýringar á hækkun vísitölunnar eru að í marsmánuði koma fram áhrif útsöluloka og hækkar verð á fötum og skóm um 9,1% (0,39% vísitöluáhrif), kostnaður við búsetu í eigin húsnæði hækkar um 1,6% (0,24% vísitöluáhrif), verð á bensíni og olíu um 5,8% (0,2% vísitöluáhrif) og flugfargjöld til útlanda um 8,% (0,11% vísitöluáhrif).
Sé horft á þróun ólíkra liða vísitölunnar má sjá að helst hefur það verið umtalsverð lækkun á bensínverði sem dregið hefur úr verðbólgu síðustu misserin en einnig hefur gengisstöðugleiki og breyting á vörugjöldum haft áhrif í gegnum innfluttar vörur. Hins vegar hefur hækkandi húsnæðisverð og hækkun á opinberri þjónustu orðið til þess að auka verðbólgu síðustu misseri.