Kjötvinnslufyrirtækið Kjarnafæði hefur sent inn erindi til Búsældar um kaup á öllum hlutabréfum í Norðlenska. Þetta staðfestir Gunnlaugur Eiðsson, framkvæmdastjóri Kjarnafæðis, við Vikudag. Hann segir málið á byrjunarstigi og lítið sé hægt að segja um stöðuna eins og er.
Haft er eftir Gunnlaugi að sameining hafi verið til skoðunar af og til á undanförnum árum. Hingað til hafi það hins vegar ekki gengið upp.
„Núna eins og oft áður er staðan innan greinarinnar erfið. Þetta er einn af þeim liðum sem við teljum að þurfi að skoða af alvöru því innangreinar hagræði er það sem fyrst ber að sækja í til eflingar og frekari sóknar. En hvort af verður veit ég ekki á þessari stundu,“ er haft eftir Gunnlaugi.
Hluthafar Norðlenska eru rúmlega 520 talsins. Eignarhaldsfélagið Búsæld, sem er félag kjötframleiðenda í Eyjafirði, Þingeyjarsýslum og á Austur- og Suðausturlandi, keypti öll hlutabréf Norðlenska fyrir 568 milljónir krónaárið 2007.
Líkt og greint hefur verið frá var Norðlenska gert upp með 48,1 milljóna króna tapi árið 2014 samanborið við 138,4 milljóna króna hagnaði árið 2013. Í afkomutilkynningu sagði að markaðsaðstæður hefðu verið erfiðar og samkeppni mikil í öllum kjötgreinum. Mikilvægt væri því að hagræða í innlendri framleiðslu og vinna áfram að öflugri vöruþróun og nýsköpun í greininni.